Der Prophet Jesaja

Der Prophet Jeſáiá.

LI.

Got­tes ewiges Heil für Israel

HOret mir zu / die jr der Ge­rech­tig­keit nachjaget / die jr den HERrn ſu­chet. Schawet den Fels an / dauon jr ge­haw­en ſeid / vnd des Brun­nen grufft / daraus jr ge­gra­ben ſeid. ²Schawet Ab­ra­ham an ew­ern Va­ter / vnd Sara / von welcher jr geborn ſeid / Denn ich rieff jm da er noch Einzelen war / vnd ſegenet jn vnd mehret jn. ³Denn der HERR tröſtet Zion / er tröſtet alle jre Wüſten / vnd machet jre wü­ſten wie Luſtgarten / vnd jre Gefilde / wie einen Garten des HER­RN / Das man wonne vnd freude drinnen findet / danck vnd lobeſang.

⁴MErck auff mich mein Volck / höret mich meine Leu­te / Denn von mir wird ein Ge­ſetz ausgehen / vnd mein Recht wil ich zum Liecht der Völ­ck­er gar bald ſtellen. ⁵Denn meine Gerechtigkeit iſt nahe / mein Heil zeucht aus / vnd meine Arme wer­den die Völ­ck­er richten / Die Inſulen harren auff mich vnd warten auff mei­nen Arm. ⁶Hebt ewr augen auff gen Hi­mel vnd ſchaw­et vnten auff die Erden / Denn der Hi­mel wird wie ein Rauch vergehen / vnd die Erde wie ein Kleid veralten / vnd die drauff wonen wer­den dahin ſterben wie a Das / Aber mein Heil bleibet ewiglich / vnd meine Gerechtigkeit wird nicht verzagen. ⁷Höret mir zu die jr die Gerechtigkeit kennet / du Volck / in

welches her­tzen mein Ge­ſetz iſt / Fürchtet euch nicht / wenn euch die Leu­te ſchmehen / vnd entſetzt euch nicht / wenn ſie euch verzagt machen. ⁸Denn die Motten wer­den ſie freſſen wie ein Kleid / vnd Würme wer­den ſie freſſen wie Wüllentuch / Aber mein Gerechtigkeit bleibet ewiglich / vnd mein Heil fur vnd fur.

Israel ruft nach der Macht des Schöpfers

WOlauff / wolauff / Zeuch macht an du Arm des HER­RN / Wolauff / wie vor zeiten von alters her. Biſtu nicht der / ſo die Stoltzen ausgehawen / vn den Drachen verwundet hat? ¹⁰Biſtu nicht der das Meer der gro­ſſen tieffen wa­ſſer austrocket? Der den Grund des Meers zum wege macht / das die Erlöſeten da durch gien­gen? ¹¹Al­ſo wer­den die Erlöſeten des HER­RN widerkeren vnd gen Zion komen mit Rhum / vnd ewige Freude wird auff jrem Heubt ſein / Wonne vnd freude wer­den ſie ergreiffen / Aber trawren vnd ſeufftzen wird von jnen fliehen.

¹²ICH / Ich bin ew­er Tröſter / Wer biſtu denn / das du dich fur Men­ſchen fürchteſt / die doch ſterben? vnd fur Men­ſchen kin­der / die als Hew verzeret wer­den / ¹³Vnd vergiſſeſt des HER­RN / der dich gemacht hat / der den Hi­mel ausbreitet / vnd die Erden gründet? Du aber fürchteſt dich teg­lich den gan­tzen tag fur dem grim des Wütrichen / wenn er furnimpt / zu verderben? Wo bleib der grim des Wütrichen? ¹⁴da er muſte eilen vnd vmbher lauf­fen das er los gebe / vnd a ſie nicht ſtörben vn­ter dem verderben / auch keinen mangel an Brot hatten. ¹⁵Denn ich bin der HERR dein Gott / der das Meer bewegt das ſei­ne wellen wüten / ſein Name hei­ſſet HERR Ze­ba­oth. ¹⁶Ich lege mein Wort in deinen mund / vnd bedecke dich vn­ter dem ſchatten meiner Hende / Auff das ich den Hi­mel pflantze / vnd die Erden gründe / vnd zu Zion ſpreche / Du biſt mein volck.

Gott weckt das erniedrigte Jerusalem

WAche auff / wache auff / Stehe auff Je­ru­ſa­lem / die du von der Hand des HER­RN den Kelch ſei­nes grimmes getruncken haſt / die hefen des Daumelkelchs haſtu ausgetruncken / vnd die tropffen geleckt. ¹⁸Es war niemand aus allen Kindern die ſie geborn hat / der ſie leitet / Niemand aus allen Kindern die ſie erzogen hat / der ſie bey der hand ne­me. ¹⁹Dieſe zwey ſind dir begegnet / wer trug leide mit dir? Da war ver­ſtö­rung / ſchaden / hunger / vnd ſchwert / Wer ſolt dich tröſten? ²⁰Deine Kinder waren verſchmacht / ſie lagen auff allen Gaſſen / wie ein verſtrickter Waldochſe / vol des zorns vom HERrn vnd des ſcheltens von deinem Gotte.

²¹DARumb höre dis du Elende vnd Trunckene on wein / ²²ſo ſpricht dein Herrſcher der HERR vnd dein Gott / der ſein Volck rechet / Sihe / Ich ne­me den Daumelkelch von deiner hand ſampt den hefen des kelchs meins grimmes / Du ſolt jn nicht mehr trin­cken. ²³Son­dern ich wil jn deinen Schindern in die hand geben / Die zu deiner Seele ſpra­chen / Bücke dich / das wir vberhin gehen / vnd lege deinen Rücken zur erden / vnd wie eine gaſſe / das man vberhin lauffe.

✽