Das Buch Jesus Sirach

Das Bucĥ
Jeẛus Syracĥ.

XLV.

451

Mose

ER hat aus jm komen laſſen / den heiligen man Moſen / der aller Welt lieb vnd werd war / vnd beide Gott vnd Menſchen jm hold waren / Des name hoch gepreiſet wird. ²Er hat jn auch geehret / wie die heiligen Veter / vnd hoch erhaben / das jn die Feinde fürchten muſten / vnd lies jn mit worten viel Zeichen thun. ³Er machte jn herrlich fur den Königen / vnd gab jm Befelh an ſein Volck / vnd zeiget jm ſeine Herrligkeit. ⁴Er hat jn auserkorn zum heiligen Stand / vmb ſeiner trew vnd ſanfftmut willen / vnd aus allen Menſchen erwelet. ⁵Er lies jn hören ſeine ſtim / vnd füret jn in die finſter Wolcken. ⁶Er hat jm gegenwertig die Gebot gegeben / nemlich / das Geſetze des lebens vnd der weisheit / Das er Jacob ſolt den Bund leren / vnd Iſrael ſeine Rechte.

Aaron

ER hat Aaron ſeinen bruder aus demſelben ſtam Leui auch erhöhet / vnd jm gleich auserkorn. ⁸Er machet einen ewigen Bund mit jm / vnd gab jm das Prieſterthum im volck. ⁹Er hat jn ehrlich vnd ſchön gekleidet / vnd legt jm einen herrlichen Rock an / vnd zoch jm allerley Schmuck an. ¹⁰Er rüſtet jn mit köſtlichem Geſchmeide / vnd legt jm an die Niderwad / den Lagenrock vnd Leibrock. ¹¹Vnd hieng viel güldener Schellen vnd Kneuffe vmb her an jn / Das es klünge / wenn er aus vnd eingienge / vnd der klang gehört würde im Heiligthum / damit ſeines Volcks fur Gott gedacht würde.

¹²JA / den heiligen Rock mit golde / geler ſeiden vnd ſcharlacken geſtickt. ¹³Das Machtſchiltlin auff der bruſt / mit dem Liecht vnd Recht / künſtlich gewirckt / mit den edlen Steinen / darinn die Namen der zwelff ſtemme Iſrael gegraben / vnd in Gold gefaſſet / durch die Steinſchneiter / das jr gedacht würde fur Gott. ¹⁴Das güldene Stirnblat an dem Hut / darin die heiligkeit gegraben war / welchs alles war herrlich / köſtlich / lieblich vnd ſchön / ¹⁵Man hat des gleichen vor jm nie geſehen. ¹⁶Es muſte ſie auch kein ander anziehen / On ſeine Kinder allein / vnd Kindskinder fur vnd fur. ¹⁷Seine Opffer wurden teglich zweimal volbracht. ¹⁸Moſes füllet jm die hende / vnd ſalbete jn mit dem heiligen Ole.

¹⁹ES ward der Bund mit jm gemacht / das er vnd ſeine Söne / ewiglich / ſo lange die tage des Himels weren / jm dienen / Prieſter ſein / vnd ſein Volck in ſeinem Namen ſegenen ſolten. ²⁰Er hat jn erwelet aus allen Lebendigen / das er dem HERRN opffern ſolte / Speisopffer vnd Reuchopffer / zum ſüſſen geruch vnd gedechtnis / das Volck zuuerſünen. ²¹Er befalh jm das Ampt ſeines worts / das er Jacob ſeine Zeugnis leren / vnd Iſrael mit ſeinem Geſetze erleuchten ſolt.

ES rotteten ſich wol andere wider jn / vnd neideten jn in der wüſten / nemlich / die mit Dathan vnd Abiram waren / vnd die wütende rotte Korah. ²³Aber der HERR ſahe es / Vnd gefiel jm nicht. Vnd ſie wurden verſchlungen

im grimmigen zorn / ²⁴Er beweiſet ein ſchrecklich Wunder an jnen / vnd verſchlang ſie mit ſeinem Fewr.

²⁵ER ehret Aaron noch weiter / vnd gab jm ein Erbteil / nemlich / alle Erſtlinge teilet er jm zu. Fur allen andern verordent er jnen / zum erſten Brots gnug / ²⁶Denn ſie ſolten eſſen des HERRN Opffer / die er jm vnd ſeinem Samen gab. ²⁷Aber ſie muſten kein teil am Lande haben / noch mit dem Volck erben / Sondern der HERR war jr Teil vnd Erbe.

Pinhas

PInehas der ſon Eleaſar war der dritte in ſolcher Ehre / Der eiuerte in Gottes furcht / ²⁹Vnd da das Volck abfiel / ſtund er trewlich / feſt vnd keck / vnd verſünet Iſrael. ³⁰Darumb ward jm gegeben der Bund des friedes / das er dem Heiligthum vnd dem Volck furſtehen / vnd er vnd ſein Same die prieſterliche wirdigkeit / ewiglich haben ſolt. ³¹Gleich wie mit Dauid aus dem ſtam Juda / der Bund gemacht iſt / das allein aus ſeinen Sönen einer König ſein ſol. ³²Alſo ſollen auch Aaron vnd ſein Same die Erben ſein / Das man vns Weisheit lere / vnd ſein Volck recht regiere / Auff das jr ſtand vnd herrligkeit nicht vntergehe / ſondern fur vnd fur bey jnen bleibe.

✽